絲絲講場：中國 「升呢」變世銀拍檔
世界銀行嘅宗旨係幫助發展中國家，中國嘅GDP依家已超越日本成為全球第二大，曾幾何時世銀都幫過中國，時至今日形勢大為不同，正如中國財政部部長謝旭人話齋，過去兩者似師徒關係，但依家就更似利益攸關嘅夥伴。
30年前首獲貸款
原來世銀早喺30年前就開始向中國提供貸款，就連四川省廣安市嘅鄧小平故里陳列館，亦存放咗一張世銀前行長麥克納馬拉與鄧小平喺八○年就恢復中國於世行合法地位會談嘅紀念照，呢張相更係由世銀行長佐利克親身由美國送到四川。
據謝旭人話，當年鄧小平向麥克納馬拉話中國好窮，又與世界失去聯繫，需要世銀幫助先可以趕上去，結果世銀第二年就批咗對華貸款嘅第一個項目，借咗2億美元畀中國做25間大學嘅設備更新，同埋資助內地師生出外深造。截至今年六月，中國共獲得世銀478億美元貸款承諾，而喺○七年，中國就首次承諾向世銀集團國際開發協會捐款3,000萬美元。
余絲韻