香港證券專業學會每年都會頒授榮譽會員資格，表揚對香港金融服務行業發展有貢獻嘅人士，今年獲得呢個最高殊榮嘅係聯交所前主席鄭維健。證券專業學會將喺十月十四日舉行嘅秋季晚宴，正式頒授呢個殊榮畀鄭維健。
鄭維健除咗係聯交所嘅前主席，亦係可持續發展委員會前主席，近年佢較為低調，不過喺今年六月，佢就罕有咁喺報章撰文，大談香港喺人民幣國際化嘅機遇。
面對中國愈嚟愈向世界開放、上海崛起，點樣先可以將香港嘅成功故事延續落去？鄭維健認為回顧香港金融業逾一百年嘅歷史，喺九十年代出現咗一個轉捩點，九三年國企開始來港上市，至今發展為香港金融市場好重要嘅一環；依家中國發展人民幣國際化，香港作為人民幣離岸中心，將肩負另一個歷史任務，相信喺長遠嘅未來可引領香港金融業闖至另一高峰。
講番呢個被喻為「終身成就獎」嘅香港證券專業學會榮譽會員資格，過去已有多位人士取得，全部都係猛人，包括李業廣、利國偉、鍾悟思及梁定邦等，而去年取得呢個殊榮嘅，係已退休嘅港交所（00388）前行政總裁周文耀。
余絲韻