返咗嚟香港，忙到自己都唔知點好，一星期後，回歸正常，繼續為大家搜索同研討唔同嘅公司一齊「股市追蹤，助你成功」咁話。
近期有一隻股份我都有留意佢嘅發展，就係英皇鐘錶珠寶（00887）。都係嗰句，內需加中國經濟持續發展，名錶、珠寶、金器自然就成為祖國同胞身份嘅證明。有一個玩錶嘅朋友問我點解「撈」喺內地咁流行，仲使講，如果「撈」係身份嘅認證，點都要整番隻，所以有需求，就有價格頂住。
如果用管理學分析，所有鐘錶珠寶公司大部分都係擔當分銷渠道嘅角色，能夠創造價值嘅，就只有係人都識講但係好難做得好嘅服務同創新，鬥價最後只會係「兩敗俱傷」，對呢個行業一啲好處都冇。
喺21世紀，真正創造價值嘅係品牌同埋知識產權（Intellectual Property），去完蒙牛乳業（02319）一轉，深深體會到中國人又向另一個境界「升呢」。
睇睇英皇鐘錶，同世界級品牌LVMH打造品牌策略聯盟嘅傳奇，都咪話唔犀利。要同世界知名品牌合作，除咗有水同有誠意，自家品牌都要有相同嘅級數，唔係點做到最強對最強呢個優勢啊？
中國黃金十年同內需，係「阿爺」一個宏遠嘅使命，如果你見到內地嘅靚車愈來愈多，咁你就可以肯定咁講名錶、珠寶需求會更大，咁樣零售珠寶鐘錶公司嘅潛力又點可以忽視呢？
香港大學電子金融服務榮譽助理教授 徐燦傑