港樂演奏貝多芬名作
其實交行今年五月已贊助咗香港管弦樂團喺本港舉行嘅世博主題音樂會，今次移師上海舉行呢個音樂會可算係「重頭戲」，由指揮家迪華特聯同港樂一班音樂家演出，樂曲方面當然唔少得貝多芬第九交響樂；另外，佢哋亦首次演奏香港青年作曲家林豐為世博創作嘅新曲《融》。
據知當晚音樂會吸引二百幾位嘉賓支持，包括上海世博局及交通銀行客戶等。交行咁落力宣傳世博，努力絕無白費，絲絲收到風，截至上月八日，交行喺世博區內嘅自助設備已處理咗逾四十萬筆交易，取款金額達三點二六億元人民幣，而銀行卡交易就有二百二十八萬筆，交易額達八點五一億元人民幣，睇嚟世博都為交行進帳咗唔少。
余絲韻