為咗令廣大投資者了解公司業務及發展，今時今日上市公司都會搞吓實地考察，不過樓東俊安（00988）行政總裁柳宇（Jaffe）早排就同絲絲講，話考察當然冇問題，但一眾女士可能會失望，皆因內地煤礦係嚴禁女性入內參觀。絲絲初時以為係咪涉及歧視女性，但聽Jaffe講解後，心情就舒暢番，原來背後原因仲幾有人情味添。
有人同Jaffe開玩笑話，萬一有女性「女扮男裝」混入去煤礦會點呢？佢就好嚴肅咁話「冇萬一」，皆因內地煤礦行業好重視呢條不成文規矩，從來未打破過喎。
但究竟點解會唔畀女性入礦區呢？原來好耐以前煤礦入面其實都有女工，而且大部分都係與老公一齊喺同一個煤礦度打工，點知後尾有啲煤礦發生礦難，搞到有唔少家庭一下子冇咗經濟支柱，小朋友仲一夜間變成孤兒。後來政府覺得唔可以畀咁嘅情況再發生，於是就完全禁止女性進入礦坑，諗番上嚟，呢條規矩其實都幾有人情味。
余絲韻