滙控（00005）嘅前大班龐約翰（John Bond）去咗英國電訊公司Vodafone（VOD）做主席唔經唔覺都做咗4年，最近有唔少關於佢嘅報道，但大多數都唔係咁正面，其實主要都係公司回報問題，皆因唔少股東都唔係咁滿意。早前喺佢哋嘅股東會上，就有股東要求公司出售包括中移（00941）嘅非核心業務，希望集中資源發展主營業務以提高股東回報，而龐主席亦係股東攻擊嘅對象之一，仲有股東要求佢辭職添。
雖然龐主席最終有得留低，但《星期日泰晤士報》有篇報道話，VOD已搵咗著名獵頭公司搵定龐主席嘅接班人。
不過睇嚟VOD對銀行大班情有獨鍾，因為其中一個人選就係渣打（02888）前主席戴維思；除咗戴維思呢位銀行家，另一位候選人係高盛前主席約翰桑頓，而約翰桑頓亦係滙控獨立非執行董事。至於其他候選人之中，就只有英國第二大電訊公司Cable & Wireless主席Richard Lapthorne係來自同業。
余絲韻