尋日保監處派咗上半年成績表，滙豐喺新做長期業務方面攞到好成績，穩坐業界一哥寶座之餘，保費更按年升咗35.8%，緊隨其後嘅係中銀人壽及國壽，至於一直傳言今年喺香港上市嘅友邦保險，仍然未上番頭5位。
成績咁好，滙豐集團總經理兼集團保險業務主管湯德信自然飲得杯落，佢話上半年市場對投資相連及退休產品需求好大，連帶滙豐嘅新做人壽保險表現強勁，當中年金及投資相連嘅保險產品更加突出，佔咗差唔多九成銷售。
查實喺今年首季，中銀人壽曾經爬過滙豐頭，今次滙豐搶番一哥個位，公司上下當然鼓舞，更反映咗佢哋嘅銷售團隊出咗唔少力，家陣滙豐喺新做人壽保險業務嘅佔有率係18.7%，未來佢哋點樣維持甚至擴大市佔率，相信會係另一個考驗。
余絲韻