月前榮登「全球新股王」寶座嘅農行（01288），上周公布咗上市後首份業績，中期盈利按年大升四成，跑贏另外三大國有內銀，實在可喜。不過睇真啲份業績報告嘅英文版，內裏原來錯漏百出，農行尋日亦急忙發出澄清通告，情況實屬罕見。
絲絲幾經比對，發現英文版業績報告存在逾50處紕漏，除咗多處錯登個別數字及用語之外，仲將一整欄二○一○年嘅中期數據，錯當○九年中期數據。農行公告就解釋，話英文版及中文版存在差異，係由於排印錯誤。
但有市場人士話，以往啲業績報告就算有錯漏，都只係按照英文版原文翻譯成嘅中文版出現誤譯，但好似農行今次咁重大嘅失誤就好少見，因為業績報告公布前都會來回幾轉，經多個部門嚴謹核對。
余絲韻