依家手執中國家電零售業牛耳嘅國美電器（00493），管理層與大股東大鬥法嘅時候，佢哋嘅強敵蘇寧電器唔單止喺業績方面靜靜起革命，已可與國美平分秋色，幾日前仲高調咁推出股票期權激勵機制，獎賞員工提升士氣，穩定公司骨幹成員。
內地家電業朋友話，今次蘇寧嘅股票期權獎勵計劃，比國美之前推出嘅更全面，因為喺蘇寧工作5年以上嘅248位中高層管理員工都可受惠，計劃佔公司股本總額約1.21%。
計劃咁「筍」會唔會引發國美員工跳槽？老友話有待觀察，但或多或少會打擊國美員工嘅士氣，事關早輪佢哋管理層推出嘅激勵計劃畀大股東黃光裕反對，家陣又話要開臨時股東大會改組董事會，仲要炒埋主席陳曉，形勢嚴峻，如果國美管理層與大股東再唔「生性」，睇怕中國家電零售業都好快要改朝換代囉。
余絲韻