由王國安任會長嘅證券及期貨業職工會，由於係代表業內唔少前線員工，一向予人印象比較激進，言論亦較大膽，絲絲收到風，呢個會將改名為「證券及期貨專業總會」。由職工會搖身一變成為專業總會，絲絲感覺係變得專業，形象立即「升呢」，唔知大家同唔同意呢？
聽聞證券及期貨業職工會改名已做晒手續，應該好快會正式易名。其實證券業嘅組織改名都唔係乜嘢新鮮事，最近期就要數到本地嘅龍頭經紀組織─證券經紀業協會改名做證券業協會，至於證券學會嘅前身就係證券業同學會。
依家「魚缸」最多人討論嘅其中一件事，就係延長交易時間，證券及期貨業職工會會長王國安早前就同絲絲講，話收到唔少行家電話，反對午休縮短到只有一粒鐘，佢仲話經紀呢行壓力好大，從人道及健康立場考慮，真係需要時間休息，就算行「輪班制」亦未必咁容易實行，因為有客有生意唔通話唔做，畀第二個同事跟咩！再講吖，午飯時間佢哋仲要同客人Social，「箍客」搵生意，講到尾都係唔想得咁短嘅食飯時間！
余絲韻