由上市到依家，瑞年國際（02010）都係筆者嘅至愛，作為擁有內地最大氨基酸營養保健品銷售商嘅最佳位置，定位為醫藥股當中散發佢獨特嘅概念，佢嘅市場佔有率超過22%，相對其他次位對手的市場份額得5%，就更加凸顯出佢嘅皇者風範。
不斷創新求變係企業生存之道。除咗主打嘅營養保健品、保健飲品業務之外，瑞年亦都積極發展藥品業務，雖然藥品分部先剛剛開波，但係透過收購南京瑞年全部股權，令佢得到生產一種抗癌藥同埋兩種眼藥所需嘅許可證、藥品嘅國家食品藥品監管理局批文同藥品GMP認證等等相關嘅監管批文。
由於發展眼藥、抗癌藥品嘅入場門檻（Barrier of entrance）同生產技術都比較高，符合一般企業策略上所講嘅獨特性（uniqueness），令到瑞年嘅競爭優勢有所提升。從分銷管道（Distribution Channel）嚟講，喺內地200間醫院推出高端技術後眼科藥品，同埋抗癌口服藥。同時間，計劃於一○年底之前將佢哋嘅分銷門市擴大到50,000間以上，再將佢哋用喺內地長三角其他省份嘅高滲透率分銷模式，嚟發展擁有強勁消費能力嘅華南同華中省份，其中廣州、深圳、成都同武漢更係重點，喺分銷戰略嚟睇梗係好嘢啦！
瑞年嘅中期純利增加咗3.3倍，毛利率明顯提升，資產負債又有改善，筆者亦都睇好佢業務往後發展嘅持續性，相信佢仍然有唔少上升空間。
香港大學電子金融服務榮譽助理教授 徐燦傑