絲絲講場：星展王潔鳳北歐充電
星展香港嘅董事總經理兼零售銀行業務總監（香港及中國內地）王潔鳳（Linda）喺上個月後失蹤咗一排，原來佢放咗個長假，參加咗北歐郵輪之旅歎世界，去咗瑞典、俄羅斯等國家，沿途風光如畫唔在講，仲覺得北歐嘅氣候好新奇，佢話本身都知北歐夏天日照時間好長，但估唔到半夜望出窗都仲日光日白，感覺好新鮮。
力攻投資理財私貸
聽完Linda咁講，搞到絲絲都心郁郁想去北歐，點知Linda突然話：「不過呢啲已經係好耐以前嘅事。」吓？佢唔係上月先去咩？原來Linda近排全情投入搞星展香港嘅Budget Plan，所以先覺得感受北歐明媚風光好似係好耐之前嘅事啫。
絲絲就順便八下未來星展有乜搞作，Linda透露會大力發展投資理財及私人貸款業務，佢話金融海嘯時市民對投資產品好有戒心，希望未來兩、三年可重回海嘯前嘅水平；至於佢哋嘅私貸業務表現好好，家陣失業率及破產數字回落咗唔少，嚟緊要加多兩錢肉緊搶佔市場。
余絲韻