絲絲講場：建行業績會全場焦點 任總亮相閃爆
尋日建行（00939）業績會議星光熠熠，唔單只一眾建行管理層，絲絲仲見到金管局前總裁任志剛，佢以建行獨立非執行董事嘅身份正式亮相，即時成為全場焦點，吸引閃光燈嘅程度媲美建行行長張建國。
張建國：好多人景仰佢
建行董事長郭樹清之前話，聘請任總只係花幾十萬一年，係有限錢，但睇到任總以非執董身份出席記招，佢真係夠勤力。張建國更加以「好多人景仰」嚟形容佢，話任總入咗建行做非執董之後，喺風險管理方面貢獻良多。
任總管錢管咗咁多年，風險管理嘅實力毋庸置疑，不過建行管理層對傳媒一向有問必答，尋日好詳盡咁答晒大家對貸款風險問題之後，任總就冇再向傳媒進一步傾吓風險管理喇。
話說任總會見傳媒，一向都係鏡頭嘅焦點，雖然佢依家退下火線，但見報率仍隨時多過做金管局總裁嘅時候，魅力依然不減，坐喺台下嘅佢，畀幾十支鏡頭對住影不停，搞到佢要同大家講影到差唔多喇，大家先停手啦。
余絲韻