自從「股神」巴菲特入股比亞迪（01211）後，比亞迪一躍成為明日之星，一舉一動都備受矚目。就好似巴菲特計劃下月訪華，呼籲中國富豪捐一半身家做慈善，坊間傳聞「股神」第一個要搵嘅對象係比亞迪董事長兼總裁王傳福，被記者問到會唔會捐出一半身家，王傳福就話冇睇到富豪捐身家嘅報道，不便置評，仲話未知與巴菲特會面時傾乜嘢。
尋日王傳福被與會人士多番追問，除咗問公司業務外，亦問佢會唔會成為中國第一個捐身家做慈善嘅富豪，皆因早前巴菲特呼籲富豪捐一半身家做慈善，喺美國已有多位富豪響應。王傳福話知道巴菲特會到中國訪問，但未知會幾時到，同埋會傾乜嘢環節，可能多數會傾吓新能源嘅問題，喺適當嘅時候佢會講畀大家知喎。
絲絲記得去年巴菲特坐過比亞迪嘅電動車，之後呢款電動車就成大熱，今次佢到比亞迪訪問，唔知會有乜新搞作呢？
巴菲特嘅拍檔芒格曾經話過，李祿係「股神」嘅熱門接班人，而李祿當年介紹比亞迪畀「股神」，一手促成「股神」入股比亞迪。問到王傳福對李祿嘅感覺，佢話李祿好有眼光，好早就投資比亞迪，成為比亞迪嘅股東之一，不過佢就唔知道李祿係唔係巴菲特嘅接班人喎。
余絲韻