市場熱線：統一係時候收集

花旗魚缸腳軟，祖國魚缸表現反覆，本地魚缸又點會有運行。昨日早段恒指略為低開後，一度跟隨祖國魚缸做好，但祖國魚缸升勢短暫，本地魚缸亦回軟，恒指在20,900點附近徘徊。恒指散場收報20,889點，再跌92點；國企指數收報11,670點，跌109點。現貨場總成交縮水至463億元，係近五個星期以來成交最細一日。

紅色地主汰弱留強

恒指仍受制於250日線，加上成交持續縮水，魚缸拍烏蠅，走勢自然偏軟，或有機會再下探20,500點。不過，古勝卻唔係太悲觀，即使暫時未見有老利消息，大戶主要係狙擊散戶資金流向，只要散戶一面倒睇淡，大戶挾淡倉根本唔需要理由。

大隻佬唔精神，兩巨無霸齊跌，大笨象（00005）跌0.2%，收報77.15元；祖國移動（00941）跌1%，收報81.95元。其他大隻佬乏善可陳，缸邊友避險情緒升溫，石油及資源股成出氣袋，跌幅較其他大隻佬顯著。即使賣地成績超過預期，但官府兩度出招壓抑樓市，確令屋仔市場交投變得呆滯，本地地主多數腳軟。

紅色地主同樣下跌，經過一年的調控，在下相信係時候為呢一場淘汰賽下結論，古勝建議可趁低收集具實力的龍頭地主，又或負債低、財務穩健的中小型地主。建行（00939）交出一份多賺27%的中期業績，但淨息差收窄，已反映其他紅色錢莊亦面對同樣問題，似乎魚缸想更上一層樓，已難寄望紅色錢莊幫到手。

統一企業（00220）已派成績表，雖然收入增長36.6%，達61.636億元人仔刷新紀錄，但股東應佔溢利卻倒退三成，只有2.98億元人仔。受到原材料價格上升影響，大部分食品股今年上半年份業績未能達到預期，幸而統一的管理層甚有信心，認為祖國快速消費品市場積極活躍，下半年營運情況值得樂觀期待。

雖然方便麵部分上半年仍虧損約1,260萬元人仔，但跟去年同期相比，已大幅減虧52.3%，反映情況已大大改善。至於強項係飲料業務快速成長，統一正在努力擴大市場份額。

睇番過去幾個月，其股價表現一直落後於大市跟同類股份，即係呢份遜於預期的中期成績表，早已在股價上反映。昨日股價反而在公布業績後逆市上升，證明芬佬亦認同下半年業績值得期待，現價已可以收集。

心水推介 先睹為快

古勝又有好介紹，從即日開始，本報專欄作者及名家心水股份推介，在每日凌晨開始上載至money18.on.cc，各位看官可以第一時間獲取最新最快之投資推介，先睹為快，縱橫股場無往而不利。

戰報

彩虹電子（00438）+15%

帥哥本月十七日指彩虹電子將有炒作，昨逆市做好，高見1.52元，較推介當日低位1.32元升15%。

中國神華（01088） +6%

高仁上周三推介中國神華，當日低位28.2元，昨日一度逼近30元關口，高見29.9元，累升6%。

古勝