市場熱線：中銀佳績可期

本地魚缸上周五在美國掛牌的ADR普遍腳軟，但跌幅尚算溫和，折合恒指大概跌百一點。市場避險情緒升溫，花旗10年期國庫債券孳息跌穿2.8厘，美匯指數重上82，全球魚缸齊插水，缸邊友忽然悲觀，之前一個禮拜的樂觀情緒蕩然無存。

話分兩頭，雖然經濟數據反映復甦步伐有所放緩，但之前各大小企業成績表交足功課，經濟陷入雙底衰退的機會唔大。古勝一直強調今年魚缸走勢唔會一面倒，有別於○八年海嘯之際魚缸直瀉，亦並非去年見底反彈，魚缸坐直升機，今年主要係睇資金流向，所以走勢較為反覆，大部分時間係上落市。

由祖國魚缸率先反彈，至花旗魚缸自七月初累積了逾一成升幅，美匯指數跌咗個幾月，美元技術反彈，引發套息交易平倉，買美元沽外幣沽股票，自然令上周各地魚缸落得如此下場。只要「息魔」一日未作怪，美元邊有本事愈升愈有，美元彈散再現跌勢，終會驅使資金再回流各地魚缸及外幣。全球未有一個主要經濟體系，夠膽在歐美經濟仍存隱憂之際收緊銀根，預期寬鬆貨幣政策仍維持一段時間，在資金充裕的情況下，總有較進取的資金流入魚缸跟匯市。

人幣業務持續增長

既然魚缸呈上落市格局，最穩陣係趁回吐買績優股，話晒有業績支持，即使魚缸調整，績優股一定可企得住腳，魚缸回升亦會率先被追捧。中銀香港（02388）下周派成績表，上周已有本地錢莊派成績表，全部業績報佳音，中銀香港相對其他本地錢莊，屬於超班馬，下周派成績表前，不妨趁回吐吸納。雖然中銀一○年中期業績表現唔會好突出，但買股買前景，在人仔國際化的進程中，作為中行（03988）子公司，中銀有更大競爭優勢，前景值得睇高一線。

中銀積極進出人仔融資及投資產品，上月發行的人仔企業債券，及以人仔結算的人壽保單反應頗佳。年底前祖國使用人仔作貿易結算的規模達100億元，中銀作為本地唯一跨境人仔貿易結算的清算行，淨係收服務費都收到手軟。隨着淨息差有所回升，中銀料最為受惠，加上中銀於中港兩地的龐大分行網絡，在受惠經濟復甦的因素下，其在港貸款及存款的市佔率料可續提升。唔少大行都睇好中銀未來盈利表現，仲出埋吹水報告唱好。現價息率達4厘，今年預測市帳率不夠2倍，現價買入，上望目標價24元。

戰報

銀泰百貨（01833）+8%

上周四高仁指銀泰市盈率吸引，當日低位8.25元，上周五股價一度升上8.93元，升幅8.2%。

銀基集團（00886）+9%

帥哥本月十一日指銀基有可為，當日股價低位3.27元，上周五一度高見3.57元，升幅達9.1%。

古勝