孖妹缸湖遊：逆向撈股講策略

颱風「燦都」帶來黑色暴雨警告，莉莉好憎恨呢個風，因為正值傍晚時候準備去做訪問之際，喺炮台山遇上水浸及膝，搞到對高踭鞋就咁報銷咗。風急雨密下要逆流而行談何容易，就好似上周瑞年（02010）無辜搞到單日股價大跌一成六，但之後反彈，夠膽逆市撈貨嘅散戶就賺到錢。其實只要熟悉「逆向策略」，就知道幾時買得過，下次遇到同類事件你識點做啦！

貝萊德董事總經理兼歐洲特別時機基金經理李凱雷：「逆向策略」係當大部分人對股市悲觀時，我哋就積極發掘吸引嘅投資機會。

「逆向策略」股神都用

莉莉好明白嗰類「畀雷擊中」股份嘅管理層心情，因為市場唔理任何澄清都會先掟貨，正如雷暴生效時有遮都冇用，所以莉莉非必要都唔想再去炮台山。

一位以前住喺炮台山嘅博士生朋友話，今次水浸唔算嚴重，記得20年前佢讀緊小學時，水浸得好高，跣到佢眼鏡都飛埋，好彩捉住條柱先冇畀水沖走，但副眼鏡就執唔番。

高妹安全留守公司避過颱風，以電話訪問貝萊德董事總經理兼歐洲特別時機基金經理李凱雷（Carl Lee），Carl擁有14年投資經驗，擅用「逆向策略（Contrarian Strategy）」選股，入行前嘅12年喺英國軍隊皇家空軍工作。「逆向策略」係當股份出現突發性不利消息時，投資者趁機搜尋估值被過分低估嘅股份，著名先鋒有基金經理德雷曼（David Dreman）、「股神」巴菲特及已故嘅「價值投資之父」葛拉漢（Benjamin Graham）。

Carl：貝萊德董事總經理兼歐洲特別時機基金經理李凱雷（Carl Lee）

膽大心細組合分散

高妹︰你嘅投資策略通常係逆流而上，投資係咪比常人大膽啲？

Carl︰主要係投資態度唔會咁一面倒，「逆向策略」係當大部分人對股市悲觀時，我哋就積極發掘吸引嘅投資機會，其實可以掉轉頭諗，當人人預測大市會向下時，就會賣出所有股票，最後股價跌到谷底只會升番轉頭。○九年大牛市前，我哋積極投資歐洲市值較細嘅公司，最後享受中高風險下帶嚟嘅回報，不過有時或要面對股票受壓風險，所以投資組合要分散。

高妹︰唔怪得你嘅組合內有近百隻股票，而散戶平時玩開就得幾隻。你對歐美經濟係咪特別樂觀呢？

Carl︰美國慢慢咁正常復甦，我認為「雙底衰退」機會唔大，預料日後經濟或會出現「債王」格羅斯所講嘅「New normal（新常態）」，歐洲屬於成熟市場，經濟增長會放緩，所以更要尋覓有較大回報嘅中小型股份，但我相信亞洲經濟增長總會強勁，受惠於中國及巴西嘅歐股會係唔錯嘅選擇。

高妹︰去年你管理嘅基金有47.5%回報，今年上半年亦升0.5%，相反上半年MSCI歐洲指數就大跌2.5%。面對一啲「出事」股份，你會否考慮趁低吸納？

Carl︰當股份受到短暫猛擊，估值會大幅下滑，投資者要先睇三樣嘢：管理層質素、公司吸引力及時間性，才判斷係咪值得買入。首先你要聽多啲管理層嘅故事、對事件反應；其次係留意公司估值及現金流入量，與行內競爭對手比較；最後就要「Make yourself think」，投資前自己有任何問號，都唔好投資住，畀時間自己諗。

吼「出事」股博急彈？

港股連升4日，「出事」股份跑贏恒指，孖妹比較近期受創股份嘅公司估值及現金流，發現以瑞年「復原」得最快，原因係停牌前股份PE（市盈率）跌到得14倍，比同類股份吸引，加上企業經營現金流非常充裕。至於霸王（01338）及紫金（02899）就仲未收復失地，因為目前PE喺同行中唔算特別平。

魚缸散戶就要好小心呢類股份，慎防中招。光大證券聯席董事莊俊榮就教路話，翻查資料，霸王事件喺半年前已有報道，消息只是「煲埋一次過爆出嚟」，認為事件唔係莊家乘機掟貨，只係畀仇家搞，但佢哋近年內地銷售唔錯，市佔率未有下跌，預料股價會彈上6元水平。反而佢對紫金就冇好感，佢話污染其實可以預先控制，但公司欠缺企業責任處理事件，短期內建議唔好冒險買入，寧願買瑞金（00246）。

宏利資產管理投資基金部助理副總裁兼產品經理江偉雄：「逆向策略」係當大部分人對股市悲觀時，我哋就積極發掘吸引嘅投資機會。

宏利資產管理投資基金部助理副總裁兼產品經理江偉雄：「逆向策略」係當大部分人對股市悲觀時，我哋就積極發掘吸引嘅投資機會。

撈貨前識別「催化劑」

莉莉走去訪問咗宏利資產管理投資基金部助理副總裁兼產品經理江偉雄（Raymond），宏利旗下「環球反向策略基金」及「美國特別機會基金」主力運用「逆向策略」，年初至今分別上升6.33%及10.14%，Raymond提醒散戶投資前要有耐性，仲向大家教授「沽貨守則」。

江：宏利資產管理投資基金部助理副總裁兼產品經理江偉雄

莉莉︰運用「逆向策略」嘅散戶要注意乜嘢？

江︰使用「逆向策略」就好似一把刀跌落嚟，接得住就安然無事，接唔住就會損手，投資時會遇到好多「價值陷阱」，個人投資者唔應該一味諗住買平貨，重點係如何識別「催化劑」對股價嘅影響，以及要有耐性。例如平日見慣股價喺10元樓上，當跌咗一、兩蚊時，散戶就即刻衝入去買，但要明白嗰次跌少少，係咪真係出現「催化劑」令嗰隻優質股變平；散戶亦要勤力做功課，唔好見到有吸引機會先至做嘢。我哋嘅基金組合內有40隻股票，基金經理一年至少都會探訪同一家公司一次。