絲絲講場：瑞銀提名任總做董事
金管局前總裁任志剛去年未退休嗰陣，已揚言要繼續為中港金融業發展作出貢獻，佢退咗休之後，好多學術團體、半官方智囊機構及金融機構都向佢招手，而且呢啲機構間間都係「重量級」，好似瑞銀尋日就宣布提名任總做該行獨立非執行董事，明年四月召開股東會表決。
退休後變「搶手貨」
自任總去年十月榮休後，喺「過冷河」期間已擔任中國金融學會執行副會長一職，之後做埋中大全球經濟及金融研究所傑出研究員；「過冷河」期一完，建行（00939）今年四月就提名佢做獨立非執董，中投本月亦宣布搵佢做其國際諮詢委員會委員。依家國際大行都搵埋任總入Board，成為瑞銀第12位董事會成員。
絲絲翻查建行去年年報，該行幾位獨立非執董去年收取酬金由36萬至44萬元人民幣（約41.2萬至50.3萬港元）；而瑞銀年報就顯示，普遍獨立非執董酬金為52.5萬至67.5萬瑞郎（約386.9萬至497.5萬港元）。
雖然任總未必志在呢啲錢，但係為中港金融業貢獻嘅同時，又有可觀嘅收入，都算係幾好嘅差事吖！
余絲韻