絲絲講場：滙豐MPF搞攝影比賽
唔經唔覺，強積金喺香港快將邁向十周年，雖然強積金一向有唔少地方為人所詬病，但近期都有唔少改進。好似強積金「半自由行」就快實施，供款人可以為自己所作嘅供款選擇強積金公司，到時強積金公司好大機會要重新洗牌，強積金嘅「龍頭」滙豐銀行亦不敢怠慢加緊宣傳，仲推出咗一個攝影比賽添。
呢個名為「滙豐強積金十周年攝影比賽」嘅活動有公開組及少年組，即係分開成年人士以及10至17歲嘅參加者，兩組嘅獎品都一樣，冠軍可以得到38,000元旅遊禮券，活動直至十月底。對於強積金公司嚟講，「半自由行」除咗要吸引其他公司嘅客戶，亦要小心留住自己原本嘅客戶，否則就得不償失。好似滙豐咁，佢哋去年已經加咗4隻基金，包括中國股票基金及環球債券基金等。
總行25周年辦展覽
滙豐除咗搞強積金十周年活動之外，滙豐總部都有另一項慶祝活動，原來滙豐總行大廈喺皇后大道中1號經已樹立咗25年，佢哋會喺下星期至八月二十日期間舉辦展覽，展覽內容包括滙豐自一八六五年成立以來4幢總行大廈嘅歷史，以及現時總行大廈嘅設計及興建，滙豐香港區總裁馬凱博亦會出席。
余絲韻