絲絲講場：滙豐世博港館「晒銀紙」
依家經常聽到有關世博嘅消息及話題，一講到香港館，似乎都係有彈冇讚，令香港有啲被比下去嘅感覺。作為香港館鑽石贊助機構嘅滙豐銀行，自然要喺香港館攞番個位搞展覽，幫手搞旺個場。
展出中港歷史鈔票
滙豐由尋日起至八月十五日期間，會喺香港館搞個「鈔票背後的故事」展覽，尋日就舉行揭幕儀式，滙豐中國候任行長兼行政總裁黃碧娟（Helen）仲親自擔任主禮嘉賓。呢次滙豐會展出56款鈔票圖像，包括佢哋自一八六五年創立以來，喺香港及大陸所發行嘅珍藏鈔票，見證過去百幾年兩地鈔票嘅發展進程，所有展材係由佢哋嘅亞太區歷史檔案庫提供。
滙豐銀行香港區CEO馬凱博話畀大家知，依家獅子「嘜頭」嘅鈔票佔全港流通鈔票三分之二，而歷年發行嘅鈔票，設計隨着時代而不斷演變，不但顯示香港嘅經貿金融發展過程，同時亦反映香港嘅獨特文化及特色。Helen就話滙豐自百多年前喺香港及上海創立，就開始喺內地發鈔，直至一九二○年代，分別喺中國7個城市發鈔，今次嘅展品都係稀有而具歷史價值嘅鈔票。絲絲相信香港館有咗呢個展覽，或者可以贏番啲掌聲。
余絲韻