英國《銀行家》雜誌公布今年度全球一千大銀行排行榜，根據銀行嘅資本實力排名，去年嘅「阿二」美銀成功撼低摩根大通，以1,600億美元（約1.25萬億港元）嘅一級資本，首次榮登全球最大銀行（以資本計）寶座，原因係美銀收購咗美林後，資本實力大大提升。
屈居次席嘅係上屆盟主摩通，佢嘅一級資本按年減少2%至1,330億美元；緊隨摩通之後嘅分別係花旗以及由英國政府持有83%股權嘅蘇格蘭皇家銀行（RBS），兩者排名都維持不變。至於滙控（00005）則仍保持喺第5位。
不過若以賺錢能力嚟計，中資銀行可謂傲視同儕。去年全球最賺錢銀行嘅三甲之中，工行（01398）及建行（00939）仍穩佔第1及第2位；至於高盛及巴克萊就分列第3及第4。
整體嚟講，喺全球一千大銀行中，中國佔咗84間，遠遠多過前年嘅52間，佔整體純利比例更高達25%，反映內地金融業日益茁壯。去年呢1,000間銀行嘅整體盈利較○八年多出約4倍，但整體回報仍較高峰時大幅回落。
余絲韻