絲絲講場：李寧品牌重塑體現進化
李寧（02331）品牌唔經唔覺已創立二十周年，早排聽聞佢哋有個重塑計劃，尋日終於喺北京揭曉，咁大件事，集團創辦人李寧、管理層、主要投資者、李寧五大金牌隊運動員代表都嚟齊，仲揀咗喺李寧北京總部中心一齊見證呢個歷史時刻。
新口號「Make The Change」
李寧品牌進化之路，原來經歷咗3年醞釀，全面重組品牌基因。呢次變化最受注視嘅係李寧品牌經典標識及口號嘅更改，新口號係「Make The Change」，體現咗從敢想到敢為嘅進化，鼓勵每個人敢於求變、勇於突破。至於李寧品牌原有標識及「一切皆有可能」嘅品牌口號並非就此退出舞台，而係將成為經典品牌資產，另有適當嘅應用部署。
李寧品牌新標識就抽象融合咗李寧原創嘅體操動作——「李寧交叉」，又以「人」字形嚟詮釋運動價值觀，鼓勵每個人透過運動表達自我。
平時好嚴肅嘅李寧尋日幽默咁話：「我也成了『90後李寧』。」「90後李寧」正係呢一次品牌重塑嘅廣告主題，不過呢個「90後李寧」殊不簡單。今次李寧品牌視覺更新嘅背後，集團仲進行咗深入嘅組織性重塑，包括運動品類規劃、生意區域劃分、產品研發設計等均進行系統性升級。
余絲韻