金管局前總裁任志剛尋日去咗聖保祿男女中學擔任畢業禮嘉賓，雖然唔係返母校，但佢嘅仔女原來係呢間學校嘅舊生，所以對於任總嚟講倍覺親切，心情大好嘅佢仲向學生親授做人道理。
任總首先以打高爾夫球為例，帶出「急事慢行、慢事急行」嘅哲理。所謂急事慢行，簡而言之即係欲速不達，佢話千祈唔好因為心急而作出錯誤決定；慢事急行即係凡事講求效率，唔好臨急抱佛腳。
唔知係咪管理香港金融系統多年，任總教學生人生風險管理時，亦不經意引用咗金融術語，好似教學生做好風險管理，同埋做足壓力測試，令絲絲諗番起以前喺金管局聽任總發言嘅日子。
不過任總自嘲話，以前之所以少年白髮，而且食極都唔肥，可能就係自己做得太多壓力測試所致，但自從退休後，白髮再次變黑，佢仲開玩笑咁話，如果同學們想保持身形苗條，最佳方法就係不停畀自己壓力喎。
當然，任總咁講無非都係想勉勵一眾應屆畢業生，紓緩佢哋面對放榜嘅壓力。佢謙稱四十幾年前自己嘅成績都係「掹車邊」至入到大學，因為六十年代香港政治動盪令好多強勁對手都出國讀書，自己先有機會升讀大學，但之後佢憑住努力不懈，以一級榮譽喺港大畢業。
任總仲鼓勵同學，無論成績好與壞都唔好向後望，最緊要永不放棄，千祈唔好低估自己嘅潛力，因為人生有好多章節和段落，要相信自己有能力改寫人生。
余絲韻