孖妹缸湖遊：着迷你裙救市？

「裙腳理論」反映經濟？

呢個「裙腳理論」係由美國經濟學者喬治泰勒（George Taylor）喺一九二六年提出，佢認為女人嘅裙長短可以反映經濟興衰，即係條裙愈短，經濟就會愈好；當年美國嘅玻璃絲襪好貴價，當經濟熾熱時，女性消費能力自然高，所以買得起玻璃絲襪，仲會以迷你裙作配襯。點解咁襯法？因為當條裙超短，大家先可以睇到嗰對又貴又靚嘅絲襪嘛。不過當經濟轉壞時，女士們嘅錢少咗，即使對玻璃絲襪變舊變爛，佢哋都唔捨得扔，惟有着條長裙遮住佢囉。雖然依家啲絲襪已經平咗好多，但「裙腳理論」間中仍被人提起。

孖妹鍾意炒股，更加鍾意股市大升，所以我哋搵咗時富金融資產管理策略師李韻儀與本地時裝設計師陳刀，拆解「迷你裙×股市」之謎。如果「裙腳理論」係真，咁孖妹一定會為咗拯救港股，日日着住條超短迷你裙返工嘅，哈哈哈。

時富金融資產管理策略師 李韻儀 資金下月回籠撐市

高妹：你信唔信呢個「裙短升市，裙長跌市」嘅理論？

李李：呢個理論幾有趣，但今時唔同往日，年代唔同咗，經濟狀況都有改變。六十年代嘅玻璃絲襪可能好貴，但依家嘅絲襪咁平，好難再用呢個理論作為量度經濟嘅標準。不過「裙腳理論」有個地方與股市好相似，就係提出咗資金流向嘅問題。

莉莉：如果港股跌市唔關條裙事，咁係關乜嘢事呢？

李李：近期市況牛皮係因為市場冇方向，一來歐債危機、歐元貶值等問題未解決，二來人民幣升值預期，亦削弱咗股市嘅動力，呢啲因素會影響資金流向。當投資者嘅信心不足，港股成交額自然少，而世界盃熱潮亦令到投資者注意力分散咗。

高妹：市場有「五窮六絕七翻身」之說，你點睇先？

李李：恒指技術走勢向好，大有機會上番50天線，但滙控（00005）及中移（00941）作為帶動港股升勢嘅火車頭，短期內股價又未必會大升，所以本月恒指高位都係睇番20,500點。至於七月有農行（01288）上市，相信資金會回籠，加上世界盃又打完，相信成交會多番啲。

返工日日着西裝裙

莉莉：本月底有啲中小型新股上市，你有乜嘢抽新股心得？

李李：揀新股要記住呢幾點：企業為行業中嘅龍頭股、行業具有獨特性、係國家政策扶持嘅板塊、PE（市盈率）約10倍、企業財務狀況要夠穩健。

高妹：講咗咁多股市嘢，不如又講番扮靚，唔知你本身鍾唔鍾意着短裙呢？

李李：長裙、短裙我都鍾意呀，着裙會畀人感覺女仔啲嘛，我最鍾意斯文及碎花嘅款式。不過因為返工關係，所以平時都係着套裝為主，但我都係着足5日西裝裙㗎，哈哈。

莉莉：咁你平時睇開乜嘢類型嘅時裝雜誌？大家交流吓嘛。

李李：平時返工都好忙，有時星期六、日又要做吓投資講座或者出Trip，所以依家我睇研究報告多過睇時裝雜誌。

莉莉：咁孖妹下次去買靚裙時，一於搵埋你，多個人多雙眼嘛。

本地時裝設計師 陳刀 潮流興短 港股有救？

高妹：問吓時裝界達人「刀哥」先，其實今年興唔興着短裙呀？

李陳：我啱啱去完巴黎、倫敦及杜拜，歐洲有唔少品牌都有推出迷你裙設計，可見今年個潮流都係傾向短裙而唔係長裙。短裙嘅質料會以雪紡料為主，另加裙襬或小碎花設計，而顏色就會流行淺啡、淺綠及淺紫。

莉莉：興着短裙，即係港股有救啦！咁你作為時裝設計師，又點睇迷你裙嘅設計？

李陳：迷你裙可以完全表現到女性嘅線條美，令雙腿變得更加修長，而且重點係任何高度嘅女仔都適合着，身材較矮小嘅女仔只要着對高踭鞋，就已經可以救番成個人體比例。

高妹：投資組合可以五花八門，咁迷你裙又可以有乜配搭？

李陳：想畀人感覺開朗及陽光啲，迷你裙可配搭高踭涼鞋；想散發高貴感覺，配搭簡單款式嘅高踭鞋已經可以；想性感或狂野少少，就可以着對短靴，甚至加對黑色魚網絲襪都OK。

莉莉：但係迷你裙都好蝦人着，唔係人人夠膽着㗎喎！

李陳：所以着迷你裙要有自信，唔好成日用手去遮遮掩掩，咁會畀人一種尷尬嘅感覺。可能係文化及眼光嘅關係，香港有好多女仔着短裙，但着迷你裙就較少，其實外國有好多肥妹仔都夠膽着，呢個係自信心問題。

着衫投資都要自信

高妹：咁我哋可以點樣培養自信呀？

李陳：其實着衫係一種個人性格嘅表現，所以千萬唔好跟風，唔好見人着乜就跟住着。香港女仔着衫有個問題，佢哋唔係跟唔上時裝潮流，反而係太過追求及接受，將所有潮流衣物都擺上身，咁樣反而冇咗自己嘅個性。有時我喺條街度，真係見到個個女仔嘅打扮都差唔多。

莉莉：投資都好講自信心，你成日掛住設計靚衫，有冇做投資先？

李陳：我有買基金、股票及外幣，大家都話歐元有機會跌到0.7美元水平，所以我都即刻轉晒入英鎊，依家都買咗啲人民幣。至於股票，我就有唔少「蟹貨」，中移係其中一隻。

高妹：咁你點樣睇「裙腳理論」？

李陳：聽落去都幾得意，其實當股市升，人嘅心情自然好，就會有心情去買嘢扮靚；當股市跌，啲人實唔開心㗎，可能連街唔想去，仲點會將自己扮靚呢？

61%散戶暫不認購新股

市況淡靜，相繼有新股押後上市，但本月仍有5隻新股招股，其中創生控股（00325）及超威動力（00951）近期招股，唔知各位股友會唔會認購？據今期《東方產經》網上民調，截至上周末晚上6時嘅結果顯示，有38.6%嘅人話「會」，話「唔會」嘅就有61.4%。

高妹、莉莉

若有料報畀高妹同莉莉或有嘢問，可電郵money.biz@opg.com.hk