市場熱線：中海資產有價
無消息等於好消息，上周除咗希臘再被「降呢」之外，沒有其他有關歐洲債務危機的消息，缸邊友憧憬呢個問題已漸受控，市場投資氣氛好轉，歐美魚缸升勢持續。道指連升兩星期，上周五微升16點，報收10,450點，一周累計升2.3%，為去年十一月以來，最大連續兩周漲幅。納指連升7個交易日，一周累計升近3%。西班牙雖成功發行債券，但歐元區的金融狀況仍起伏不定，一旦歐洲金融市場再轉差，魚缸跟匯市難免再有震盪。值得留意係金價再創新高，最高見每安士1,263.7美元，連升四個星期。斷估專家睇今年金價或衝破每安士1,400美元，明年目標更可高見1,600美元。
上周歐美魚缸能保持箭嘴向上，好大原因係無重要經濟數據左右魚缸去向。今個星期焦點係聯儲局在明日開始，連續兩日舉行會議，討論焦點係花旗金融監管改革法案進展。缸湖傳聞更指出，仲有不足兩個星期就到花旗國慶日，此前料可落實金改法案雛形，只要最嚴苛部分被刪除，花旗魚缸仍有機會更上一層樓。
北大人在上周六突然宣布放寬人仔匯率彈性，變相容許人仔循序漸進地升值，古勝相信本來疲弱的祖國魚缸有救，今日或能止跌回升。紅色金融股料可受惠人仔升值，重量級祖國移動（00941）持有大量人仔茄薯，人仔升值佢直接受惠。以人仔作收入，但又孭外匯債的紅色飛機，同樣慳番一筆，股價料有正面刺激。
人仔升值利好內房
至於最直接受惠的，莫過於有大量人仔資產，即祖國土地儲備的紅色地主。買股要買龍頭股，紅色地主首選係中國海外（00688）。今年三月份，國資委要求78間非主營地產業務的央企退出房產市場，正好為中國海外呢個行業龍頭，提供更多購併機會。雖然央企從事房產業務，僅佔整體房產市場盈利約5%，比重好有限，但只要對公司有幫助，中國海外仍會探討購併的可能性。集團今年初訂立全年新增土儲約600萬平米，至今已完成450萬平米，料今年可成功達標。至於全年目標為銷售面積不少於480萬平米，銷售額可達500億元，至今年五月底止，已達標逾40%，由於下半年有更多新盤推出，全年銷售目標維持不變。即使內地房價有所回落，亦見有其他發展商調低價格賣樓，但公司管理層有信心，集團今年毛利率可維持超過30%水平。
戰報
中國燃氣（00384）+9.6%
帥哥本月十七日推介的中國燃氣，股價高見4.32元，較推介當日低位3.94元，升9.6%。
百麗國際（01880）+19%
桃桃本月九日推介的百麗國際，推介當日低位9.78元，上周五高見11.64元，累升19%。
古勝