股神巴菲特慈善午宴競價時段就快完，絲絲尋日上eBay睇吓會唔會打破趙丹陽喺○八年嘅211萬美元紀錄，截至尋晚個價去到超過150萬美元，破紀錄機會真係一半半。點解機會係一半半？皆因絲絲喺兩個唔同嘅時間上網Check，下晝個價只係98萬美元，點知食完晚飯再睇，個價已Bid到超過150萬美元，仲有十幾粒鐘先至完Bid，真係乜嘢事都可以發生。
絲絲覺得今次拍賣過程較以往沉悶兼慢板，有人估計可能與巴菲特講到明，允許競拍成功嘅人攜帶7位親友共同進餐，但只談慈善不談股票有關。
有「中國私募基金教父」之稱嘅趙丹陽，○八年以211.01萬美元巨資中標，創出午餐拍賣金額新高。趙丹陽其後披露曾向巴菲特極力推薦在港上市嘅物美商業（08277），自此之後，物美喺市場上表現極好。唔知係咪因為巴菲特為避免被媒體炒作，從而引導市場，所以今年飯局有新規矩，飯照吃，但不談股票，只談慈善。
余絲韻