絲絲講場：渣打私場睇波照顧夥計
好多「賓卡」已經正式投入世界盃盛事，渣打香港更係非常應景，佢哋嘅中小企理財香港及華南總監區偉權（Kelvin）尋日已經與成班同事一齊着晒波衫返工，大事慶祝世界盃嘅來臨。
估贏賽果 全包睇英超
尋晚慶祝完，各場賽事即刻接連開波，絲絲聽講渣打成班同事今日會喺觀塘嘅渣打大廈一齊睇波，仲要直落睇足兩場，分別係南韓對希臘以及阿根廷對尼日利亞，尋晚已有過百個渣打員工報名齊齊睇，真係熱鬧過落吧睇波。
公司唔單止預埋場地畀同事睇波，仲考吓同事眼光，搞咗個網上比賽，要大家估足四十八場分組賽賽果，最高分嘅同事可以喺下個球季，組織二人行去利物浦主場睇英超強隊現場比賽，仲有五日四夜住宿連機票，全部由公司包辦。
近排各大投行都推出世界盃「波經」估冠軍，渣打員工就要估晒四十八場賽果至可以突圍，難度一啲都唔低。
余絲韻