恒隆地產（00101）執行董事吳士元（Terry）早前剛行使咗購股權，低價認購恒隆地產及恒隆集團（00010）股份，但不到一個多星期就喺市場悉售有關股票，根據聯交所股權變動資料顯示，Terry喺本月四日至八日以每股介乎28.2至28.4元，盡沽323.9萬股恒隆地產股份，同期亦以每股38.3至38.5元悉數沽售125萬股恒隆集團股份，合共套現近1.4億元。
其實今次計落都幾「和味」，因為Terry行使恒隆地產及恒隆集團嘅購股權，行使價只分別係每股9.2元及5.87元，扣除認購嘅成本3,714萬元，佢都淨袋逾1億元，呢幾年佢咁辛苦為恒隆東奔西跑，都算有回報。
不過，Terry行使完購股權，咁快即刻沽晒，加上陳南祿又將於七月履新加入恒隆地產及恒隆集團擔任董事總經理，好容易引起市場不必要嘅猜測，本來絲絲諗住打電話畀Terry，恭喜佢賺咗一大筆兼問清楚，奈何搵極都搵唔到佢，惟有喺呢度向佢呼籲，得閒有時間就打電話畀絲絲吹吓水！
余絲韻