絲絲自問一向有生意頭腦，可惜苦無資本，有創新嘅Idea都冇乜用。今年香港貿發局就投放2,000萬元，首次推出「中小企創業支援服務」計劃，夥拍多個機構以支援中小企。
計劃嘅頭炮係為成立唔夠3年嘅中小企業提供場地優惠，喺貿發局搞嘅展覽會擺展覽，租金均有折扣優惠。若青年人想開舖做生意，但資金又唔夠，都可以喺貿發局搵到資料，例如絲絲從中知道青協搞嘅「青年創業計劃」，係針對18至35歲嘅青年創業家，提供最高10萬元免息貸款，受惠對象至今有七成仍繼續經營，其中約三成已營運超過3年，佢哋話對成績都算感到滿意。
另外，貿發局喺本周五、周六喺會展搞嘅「創業日」，到時會有多場研討會，有專家及成功創意者分享致勝秘訣。
余絲韻