阿里巴巴（01688）主席馬雲一向妙語連珠，為大家帶嚟唔少驚喜，最近佢老哥又話前幾個星期去咗微軟蓋茨屋企，加埋蓋茨老友股神巴菲特，三位大佬吹咗水好耐。唔知繼索羅斯買咗阿里些少股份後，蓋茨同巴菲特又有冇機會入股阿里呢？
話說回頭，馬雲、蓋茨及巴菲特其實早已經係舊相識，當年馬雲仲未廣泛受世人認識嗰陣，雅虎楊致遠就帶咗馬雲去參加蓋茨及巴菲特嘅聚會，蓋茨、巴菲特係老友就係人都知，佢哋Friend到直情一齊「晒冷」捐身家，所以今次係舊朋友聚會一啲都唔奇。
不過幾位大哥未來會有深入合作亦一啲都唔奇，依家阿里大股東雅虎就用緊微軟嘅搜尋引擎「Bing」，股神巴菲特一向都唔鍾意科技股，但兩年前佢就一改作風出擊買比亞迪（01211），所以話呢幾位仁兄會有令世人驚喜嘅合作都唔出奇。
除咗幾個星期前去咗美國外，馬雲呢幾日都去咗台灣，一如所料，呢位「財金金句王」又有金句出現，佢盛讚浙江政府嗰陣，就話「最好的政府就是不管的政府，最好的婆婆就是不管事的婆婆。」即時引嚟全場掌聲。
余絲韻