歐美股市隔晚在歐洲的救市方案刺激下顯著上升，不過唔少投資者對救市方案成效存疑，歐元再度回軟。昨日亞太區股市普遍回落，港股亦跌逾1%。光大國際（00257）暫守3.5元水平，詩詩仍持有，但股價若再下試上周低位3.38元而失守，詩詩會考慮清倉離場。歐洲市況不明朗，呢幾日走勢更趨波動，實非好事，持有現金係當前市況下的上佳策略，詩詩「寧買貴，莫買錯」，待市況回穩才再入市。
至於即市炒作仍有選擇，主要係挑選已較高位大幅回落但成交維持活躍的股份，瀋陽公用（00747）係不俗之選。瀋陽公用停牌超過5年後，終於應港交所（00388）上市上訴委員會要求進行重組。公司亦得到核數師確認，進行業務出售及收購，並跟港交所達成多項復牌條件，上月初成功復牌。由於有消息指，瀋陽公用將再度注資，並引入新股東，壯大財務基礎，刺激其股價復牌後一度炒高至1.3元。可惜注資消息一直只聞樓梯響，其股價亦跌足成個月，現價差不多跌近剛復牌時的低位。即使注資仍未落實時間表，但股價在0.7元水平已找到支持，現水平買入，再下跌風險有限。惟須注意此股波幅較大，短炒嚴守0.68元止蝕的紀律。
詩詩