下月舉行嘅南非世界盃舉世矚目，連美資大行高盛都出咗份報告嚴選世盃夢幻陣容，當今兩大「球王」美斯及C朗（基斯坦奴朗拿度）都大熱入選，高盛仲搞咗個統計，話原來經濟環境與新興國家嘅足球水準大有關係喎。
絲絲尋日拜讀咗高盛嘅《世界盃與經濟》（The World Cup and Economics）報告，原來高盛有唔少員工都好鍾意睇波，好似佢哋喺意大利嘅一班外匯交易員就連同客戶投票選出夢幻陣容，熟悉面孔除咗美斯及C朗之外，仲有朗尼、卡卡以及因為撬隊友牆腳而出晒名嘅泰利等。
好多球迷會覺得足球與經濟冇乜關係，正如經濟大國美國嘅足球水準唔算超班，不過高盛經濟分析師Jim O'Neill就唔同意，佢將新興國家嘅人均國民生產總值與世界足協嘅排名做咗個比較，發現原來除咗「足球王國」巴西之外，新興國家嘅經濟基礎愈好，足球排名就愈高，皆因一個國家經濟愈好，就愈能夠投資喺體育運動方面。之但係點解要除咗巴西呢？阿Jim冇解釋，絲絲心諗莫非係巴西人寧舍堅毅，愈窮就愈畀心機踢波？
（余絲韻）