政府鼓勵上市公司要適時披露股價敏感資料，更建議將披露股價敏感資料法定化，以增加執行嘅力度，不過，絲絲就聽聞政府及證監會下月九日喺香港證券專業學會講解有關披露股價敏感資料法定化諮詢文件時，就唔畀傳媒採訪，絲絲覺得似乎有啲違背佢哋要增加透明度嘅原意喎！
證券專業學會每月都會舉辦多場講座，邀請唔少來自監管機構、政府部門、金融業市場嘅有分量人士，講解市場發展或政策最新動向，不過傳媒都唔係次次有機會有得入去聽㗎！
講番政府嘅披露股價敏感資料諮詢文件，下月二十八日將會結束諮詢，絲絲曾經與部分上市公司負責人傾過，雖然話違反披露並無刑事責任，但佢哋仍然好擔心，話始終唔係好清楚股價敏感資料嘅定義，雖然早前立法會一班議員普遍對呢方面嘅反對聲音唔大，但睇嚟有關諮詢仍難免有一番爭議呢！
（余絲韻）