絲絲講場：合動3董劈炮巫總勞氣
合動能源（00578）三名獨立非執董日前一齊辭職，搞到公司復牌後股價連跌兩日，尋日公司董事總經理巫家紅就呢件事解畫，佢話三名獨立非執董辭職前並無知會公司，只係直接通知聯交所，結果要由聯交所通知番公司，巫總為此相當勞氣，仲話唔認同三人辭職嘅原因。
盼可換股債盡快批
不過辭職已成事實，巫總依家最心急嘅，係希望聯交所可以盡快批核公司發行十二億元可換股債嘅有關文件，等公司可向股東發通函開股東會。
巫總話雖然已答覆咗聯交所嘅多番提問，但聯交所遲遲未批，加上三名獨立非執董突然辭職，唔多唔少為公司增添負面影響，佢只能夠話希望可於本周內獲批，否則公司嘅路只會愈走愈窄咁話喎。
講講吓，巫總一度因喉嚨不適而講唔到嘢，要由首席財務總監李俊安頂上，稍作休息後，巫總當然冇事，但佢亦不諱言話，可能呢排與聯交所講嘢太多，所以搞到喉嚨唔多舒服，作為旁觀者，絲絲只希望巫總嘅努力唔會白費啦。
余絲韻