絲絲講場:翁世權投渣打「湊B」備戰

絲絲早前預告過,翁世權(Simon)已經辭去法巴股票及衍生產品部執行董事一職,尋日八卦妹同絲絲講,話Simon準備喺七月重返戰場,會過檔到依家仲未有輪出嘅渣打(02888),家陣Simon正享受緊天倫之樂,佢仲話囝囝由細B變成「巨B」。

過檔輪證新軍開荒

呢大半年輪場人事變動真係好似車輪轉,絲絲有時都搞唔清楚邊個去咗邊度,睇嚟係時候要畫個人事架構圖至得。Simon大概仲有兩個月就過完冷河,據講去渣打做開荒牛,幫手打造輪證品牌,所以依家正喺度叉緊電。

Simon另謀高就,另一邊廂,法巴嘅股票及衍生產品部就有兩小花,即係兩位聯席董事趙海珠及郭小菱撐住,仲未有新老細上場,唔知兩小花可唔可以趁機上位擔大旗呢?

絲絲想同Simon求證吓過檔渣打嘅傳聞,但佢點都唔肯講呢個傳聞係真係假,只係話仲過緊冷河,前排先帶埋老婆及15個月大嘅囝囝一齊外遊,返香港後仲係成日與屋企人周圍去玩,享受天倫之樂。Simon仲同絲絲講,話佢個囝囝初出世嗰時明明係細碼,依家已經變成「巨B」,人哋望落去仲估佢有兩歲大添!佢話自己細個時一樣好高大,囝囝梗係深得遺傳啦!

余絲韻