美股結束長達八星期升勢，上周五三大指數顯著下跌，拖累港股ADR急挫，恒指今日勢重返二萬一點之下。睇樣美股似見頂，若然內地股市繼續疲弱，在兩面夾擊下，港股都係凶多吉少，幸而詩詩手上只持有光大國際（00257）一股，料可避過一劫。
上個星期港股反反覆覆，唔少股仔疲態盡現，國中控股（00202）係少數能逆市做好的股仔，相信係其股價經一輪調整後，現水平已吸引投資者入場。
上周國中控股宣布配股，但股價竟能逆市上升，主要係內地環保及污水處理業務近年甚得基金歡心，自然對國中投信心一票。國中以每股0.65元配股集資2.86億元，用作發展環保及污水處理業務，集團亦正尋覓合適的項目作收購。國中除咗業務前景吸引外，集團所持有黑龍江國中A股七成股權，市值達23億元人民幣，遠超國中目前約19多億港元的市值，現價未完全反映其實際價值，令國中在配股後仍能節節上升。單係計及所持A股市值，國中現價已有高達20%的上升空間，就算打番個折扣，上番1元亦好合理。
詩詩