孖妹缸湖遊：對沖舵手「朝聖」添修為

每年五月嘅第一個周末，數以萬計嘅巴郡股東湧到「股神」巴菲特嘅家鄉奧馬哈「朝拜」，只係為咗一場「神聖大會」；曾經多次「朝聖」嘅美國對沖基金經理傑夫‧馬修斯（Jeff Matthews）以電郵與孖妹分享股神所授心法之餘，亦講解今年對沖基金嘅策略。錢從來唔易賺，特別遇上今次港股大牛皮，有逾30年華爾街投資經驗嘅馬修斯竟然話，每隔幾個月就覺得自己係「投資白癡」。

快將54歲嘅馬修斯，佢嘅正職係對沖基金Ram Partners掌舵人，喺○七及○八年曾親臨奧馬哈「朝聖」，佢將年度股東大會嘅第一手觀察記錄落嚟，結集成書《Pilgrimage to Warren Buffett's Omaha》（中譯《朝聖巴郡》），今年仲會喺股東大會上搞簽名會。

JM︰美國對沖基金經理傑夫‧馬修斯（Jeff Matthews）

最愛格言「唔好輸錢」

莉莉︰三日兩夜嘅股東年會，當中只有6小時問答環節，你期望會見到乜？

JM︰見到好多人！巴郡收購咗「鐵路王」BNSF，日後業務唔使太側重於巴菲特嘅揀股能力，我諗好多人想知巴郡嘅發展路向，去年已經有35,000人「朝聖」，今年會有更多，估計約40,000人。

高妹︰請用一句說話嚟形容股神。

JM︰佢做所有事情都好理性（He is rational in everything he does）。

莉莉︰你最鍾意巴菲特嘅哪一句投資格言？

JM︰「法則一：唔好輸錢；法則二：唔好忘記法則一。」我每日做對沖都會記住呢句格言，盡量減少投資組合風險。

放大圖片

股神曾管理對沖基金

高妹︰作為巴菲特嘅超級fans，點解你成立對沖基金，而唔係成立價值型基金？

JM︰對沖基金嘅好處，係唔需要喺股市升時至賺到錢。我畢業後就喺華爾街工作，七九年加入美林，九四年成立對沖基金公司，當初儲到啲錢，手上亦有幾個潛在客戶，所以就開始管理對沖基金，公司成立初期，我老婆都要出番嚟工作。事實上，巴菲特成立巴郡之前，都係管理對沖基金，佢喺一九五六年管理私募對沖基金Buffett Partnership Ltd.，由合夥人提供資金，巴菲特負責管理基金及收取表現。呢隻對沖基金喺六九年就結束咗，然後巴菲特將專注力放在巴郡。

莉莉︰巴菲特咁富有，係因為佢有兩個習慣──理性和節儉，你有冇學佢咁慳錢？

JM︰巴菲特慳家本領出晒名，唔追求大屋、名車、珠寶，佢又唔賭錢，喺投資上，我100%同意呢個節儉態度，咁樣唔易迷失方向。但喺對待家人方面就唔值得學習，巴菲特嘅小朋友仲好細嗰陣，佢工作時間好長，冇時間陪仔女，女兒要求爸爸陪睇戲，巴菲特只係畀錢個女自己睇。我覺得成立對沖基金並唔係想做世界首富，錢應該要花費喺生活享受上，尤其係旅行，更加要花多啲時間照顧屋企人，包括我兩個女。

初次買股夾股神Taste

高妹︰巴郡基本上係一家龐大嘅保險集團，但美國保險業正經歷下跌周期，點解巴菲特仲咁努力經營保險業？

JM︰因為保險生意與世界上其他產品或服務唔一樣，就算保險公司最終唔使畀賠償，但投保人都要先畀保費；而且由於巴菲特主要係用保費嚟理財增值，所以業務達到收支平衡就得。

莉莉︰講番你自己，你人生中買嘅第一隻股票係乜？

JM︰我喺10歲時買咗第一隻股票，當時都唔知上市公司係乜嘢，但知道可以靠買股票嚟擁有一家公司；我好鍾意飲Dr Pepper汽水，所以有一日阿媽帶我落本地嘅美林證券開咗個戶口，就買咗幾股Dr Pepper股份。由當時開始，就知道可以擁有自己最愛嘅汽水、零售商、IT公司，受惠於呢類公司嘅增長。

莉莉︰股神鍾意可口可樂，你就鍾意Dr Pepper。

每隔數月自覺「白癡」

高妹︰喺金融海嘯時，對沖基金受盡千夫所指，當時你有冇氣餒？

JM︰好多人鍾意指摘經紀（Shoot the messenger），即使雷曼管理層都有責怪沽空交易員及對沖基金，人類嘅弱點就係責怪其他人多於展望將來。對沖基金係一項創新投資，長遠嚟講，醒目嘅對沖基金經理會取代「水皮」嘅基金經理，我有信心對沖基金可以持續落去。如果你從來冇感受到氣餒，投資時就唔能夠承受風險，有差嘅市場風險，亦都有好嘅風險。八○年嘅石油危機時我就經歷好大風險，好快就損失咗好多錢，由嗰時開始，我就開始學習巴菲特以及更多對沖投資上嘅知識。

莉莉︰當投資蝕錢時點樣克服難關？

JM︰其實喺呢行，每隔幾個月你就會發現自己係一個「白癡」，做得耐，你就要識得習慣，調整思緒變化。

高妹︰你點睇今年美股表現？

JM︰我從來唔睇標普500指數，每日只會緊盯自己嘅股票組合，正如巴菲特，我唔識估股市會去到幾多點，亦唔值得浪費時間擔心指數走勢。

莉莉︰今年要留意哪類投資風險？

JM︰依家美國經濟向前，復甦速度好快，好似去年中國咁，我擔心通脹會來臨。