記得財經評論員David Webb早前話要專心監察上市公司，唔會再每年推介股份，唔少Webb迷都好失望，不過睇番阿Webb近日嘅「產量」，絲絲又的確覺得佢好勤力，繼早前連續兩篇關於意馬（00585）嘅評論文章後，尋日佢又有出品，呢次佢唔係再評論邊間公司有泡沫、邊隻股份有90%下跌空間，而係再次將上市公司管理層嘅學歷起底。
今次阿Webb寫嘅係蒙牛（02319）創辦人之一兼執行董事楊文俊嘅學歷，佢提到當年蒙牛嘅招股書寫住，楊總○三年喺美國一間叫Barrington嘅大學取得工商管理碩士學位，剛啱趕得切公司喺○四年上市，而蒙牛○八年嘅年報亦一再寫明，楊總確然持有Barrington嘅工商管理碩士學位。不過阿Webb話，呢間Barrington大學只係一家總部設喺奧拉巴馬州嘅公司，據南佛羅里達商業雜誌一份偵查報道，Barrington大學嘅總部喺○○年時只係一間留言、秘書及簿記服務流動電話公司。聽講公司已向楊總了解Barrington大學情況，希望好快有結果啦。
余絲韻