美國前財長保爾森喺退休後出咗本書，爆咗好多驚險過電影嘅金融海嘯劇情，近日佢又去咗大陸，接受咗央視嘅訪問，期間又有新料爆。
負責訪問保爾森嘅正係佢老友央視主持人芮成鋼，兩年前芮成鋼有幸被邀請與保爾森一家人共進晚餐，嗰時嘅保爾森好有活力；芮成鋼與同事喺今次訪問當日，好感慨咁話保爾森老咗好多，催人老嘅唔係歲月，而係金融海嘯。
對於有傳言話保爾森為咗令7,000億美元嘅救市方案獲國會順利通過，不惜向眾議院女議長佩洛西下跪，保爾森喺訪問中提供咗答案。
喺○八年九月底正值風雨飄搖嘅日子，保爾森與聯儲局主席伯南克喺國會為救市計劃努力展開游說，但國會少數派領袖仍提出反對，聲稱要保護納稅人金錢，保爾森話為咗取得進展，又為紓緩氣氛及帶來歡樂，所以單膝跪喺佩洛西面前，要求佩洛西嘅黨派唔好撤銷對方案嘅支持。
呢一跪，世人喻之為最昂貴嘅下跪，亦正係呢一跪令救市方案獲通過，阻止更嚴重嘅災難出現。
余絲韻