絲絲講場：葛霖豪捐千萬股份
金融海嘯之後，絲絲見到好多政客都將大部分責任歸咎於銀行家嘅貪婪，英國政府及民間輿論更加對銀行家嘅薪酬死咬唔放，滙控（00005）及渣打（02888）即使唔使政府注資，高管嘅花紅一樣唔可以袋袋平安，要捐出嚟，依家連分到嘅「紅股」都冇得留低！
之前一直有人話滙控行政總裁紀勤嚟香港，係為咗避英國花紅稅，佢喺業績時就用行動證明冇啲咁嘅事，將四百萬鎊花紅捐晒畀慈善機構。絲絲收到風，佢仲會捐出持有嘅七點四萬股滙控股份，計番尋日股價，即係又再捐多五百八十八萬港元，連主席葛霖都共同進退，捐出近十二點五萬股滙控，價值等於九百九十四萬元，真係唔話得。
「智醒老友記」首批返工
除咗捐錢之外，滙控仲好努力用請人嘅方式做一啲對社會有益嘅事，絲絲記得佢哋二月推出「智醒老友記」計劃，依家已經請咗第一批退休人士，總共四十幾人，尋日正式開始喺各間分行返工，聽聞呢個計劃反應幾好，仲已經請緊另一批添。
余絲韻