絲絲講場：農行IPO承銷一叮選秀

21家中外投行激鬥

呢場喺北京進行嘅選秀Show，包括有高盛、大摩、中金及中信在內嘅21家投行參加，有人形容呢次係難得嘅「盛宴」。據講經過兩輪篩選後，農行預計將於兩日內最終確定承銷商名單，一直為農行重組、改制做財務顧問嘅中信及中金，好可能成為農行上市嘅兩家保薦機構。中信及中金幾乎參與過所有內銀股嘅上市項目，例如中信就曾參與建行（00939）、工行（01398）及中行（03988）嘅A股上市，而中金亦僅錯過咗中行嘅IPO。佢哋今次嘅對手都唔弱，包括有銀河、國泰君安、招商等內地大型券商。

國壽放風有興趣入股

外資投行又點會袖手旁觀？高盛、大摩、摩根大通、瑞銀、瑞信、德意志銀行、麥格理、野村證券等都積極爭取農行H股IPO。

今次嘅「大茶飯」固然受投行注目，至於邊個會入股亦係焦點。近年經常投資大型新股嘅中國人壽（02628），其董事長楊超尋日就被問到對農行有冇興趣，佢話與農行一向有戰略合作，雙方有好多接觸，雙方業務互補性好強，仲話雙方互相控股嘅意欲好高，會積極推進投資農行，但一切要視乎政策及農行嘅上市進度。

余絲韻