市場熱線：銀建轉型惹憧憬

祖國有機會請「息魔」出動，祖國魚缸腳軟，但本地魚缸尚算精壯，尤其長假後首日魚缸成交激增至近900億元，反映缸邊友強烈的入場意欲，只係當日升勢急咗些少，昨日難免有些少回吐壓力。不過，花旗財長突然訪華，缸邊友揣測人仔匯率短期將向上調整，刺激紅色分子做好，為本地魚缸帶來一定支持。

大象80元邊可入貨

恒指昨日低開後，三扒兩撥已脫離盤中21,814低點，但成交轉趨活躍，反映有資金流入香江，古勝相信月內恒指挑戰22,500點水平機會甚大。恒指收報21,867點，下跌61點；國企指數跌132點，收報於12,855點。現貨場成交額略微縮減至701億元，回調成交縮水，反映沽壓有限。

重量級祖國移動（00941）終有出頭天，昨日升1.7%，升幅僅次於思捷（00330）的3%，成為大隻佬升幅亞軍。古勝昨日表示祖移大落後，係時候發力急起直追。睇番公仔圖表，升浪只係剛剛開始，一旦股價升穿78元，可直指82元目標。

大笨象（00005）則微跌，在下估計大戶未儲夠子彈，刻意壓價，惟相信只要後市仍向好，最終好友一定搵大笨象幫手，趁股價在80元邊緣，不妨上車等運到。

港交所（00388）隨着近日成交額增加，料股價可拾級而上，料可回補142元的下跌裂口。祖國野獸（02628）慷慨派息，末期息高達70分人仔，派息比率達60%，遠高過「大魔頭」預計派息36分人仔，孖屐則普遍預計派息20-53分人仔。唔排除有好息之徒會搶息，亦係可以趁調整吸納的大隻佬之一。

昨日古勝品題的中航科工（02357）逆市升1.7%，收報4.04元，今日派成績表應可報佳音，中銀吹水報告調高其目標價至4.58元，較現價仍有超過一成上升空間。另一今日派成績表的銀建國際（00171），同樣逆市升2%，收報3.01元，若然派成績表後股價回調，係上車好機會。

銀建去年底成功引入中國廣東核電集團作為策略股東，擺明車馬轉型至天然資源、能源同埋核能方向發展。廣東核電在去年以每股2元認購銀建3.64億股新股，明顯係為咗旗下資產找尋上市渠道，換句話講，銀建今年大有機會獲得呢個股東注資。

廣核注資事在必行

銀建本來係收買佬，專處理買賣金融及證券業務，公司管理層在過去一年不斷出售核心業務，明顯為咗轉型鋪定後路。

呢幾年祖國重視環保，對於污染較少的核電，北大人開始出力扶持。銀建把握去年行業低潮，泊到廣東核電呢個大碼頭，涉足電力行業，確係有運行，一定能夠受惠國策。銀建較早前又斥資9.8億元入股一間煤炭企業，向成功轉型再邁出一大步。

古勝