獅子銀行香港區CEO馬凱博履新後，尋日首次公開露面。佢今次重臨香江應該都好快習慣，因為對上一次喺香港，佢都工作咗6年，所以對香港好有認識。
絲絲聽傳媒友人講，話馬凱博好早期已經去過中國大陸，嗰陣時仲係用外匯券嘅年代，喺大陸嘅外國人唔多，唔似今時今日通街都見到外國人。有一次佢喺成都要買回程車票時，因為當時做法係要將證件交畀內地人員保管，先至買到車票，所以啲證件就落咗喺人哋手上，等到要攞番證件時，點知啲內地人員話唔知去咗邊，搵嚟搵去，最後竟發現原來咁重要嘅證件放咗喺枱底用嚟「攝」枱腳，真係講都冇人信。
馬凱博又好記得當時喺大陸買罐可口可樂要3蚊外匯券，而住酒店只需兩蚊外匯券，見到友誼商店就好似喺沙漠中見到綠洲一樣。由於佢有學普通話，所以同我哋祖國同胞勉強都可溝通。
喺大陸咁多城市中，佢對西安嘅印象最深刻，因為見到壯觀嘅兵馬俑。
余絲韻