內地好多運動品牌都相繼上市，反映呢個行業競爭激烈，爭人才係經常見到嘅現象。絲絲尋日見到特步（01368）主席丁水波，原來佢哋請咗李寧（02331）前ＣＦＯ陳偉成做公司非執行董事，丁總話好多行家知道陳偉成做管理出色，透過朋友介紹認識對方，發現大家理念相同，所以一拍即合。正謂知己知彼、百戰百勝，唔通特步想借助陳偉成挑戰體育用品「一哥」李寧？
陳偉成喺李寧做咗五年ＣＦＯ，○八年離開，銷聲匿迹咗一排，今年先知佢嘅新動向，就係出任莎莎（00178）非執行董事，同時喺紐約證券交易所及倫敦ＡＩＭ上市公司ReneSola做獨立董事。
丁總話陳偉成喺體育行業有豐富管理經驗，有助公司優化產業，又可以為公司提供唔少寶貴意見。
絲絲問到丁總，點解唔叫陳偉成到公司幫手管理業務，丁總冇直接回應，只係話陳氏嘅意見有助公司整合及管理業務。
絲絲認為依家體育用品競爭咁激烈，有多位勁人坐鎮都可以嚇吓對手嘛。
余絲韻