絲絲講場：常振明總收入排尾三
中信泰富（00267）嘅年報新鮮熱辣出爐，絲絲好想知主席常振明喺公司炒燶外匯後接手呢個爛攤子，到依家差唔多一年，公司業務重上軌道，究竟佢嘅報酬會唔會係天價呢？答案揭盅，實在令人估都估唔到嘅係，原來前主席榮智健個仔榮明杰○九年嘅總收入仲高過常振明，仲足足多出近五成，全年總計有成1,252.5萬元；至於奔波咗年幾，忙於重組公司業務、債務嘅常振明就只有835.8萬元，係10位主要管理人員收入由尾數上嚟嘅第3位。
薪金津貼冇份
常總嘅副手、董事總經理張極井去年總收入就排尾二，只有280.5萬元；總收入最少嗰位同樣係母公司派嚟嘅李士林，只有71萬元。睇真啲，可能因為常振明及張極井仲<img src='/font/fb66_5nbk.gif' border='0'/>緊母公司嘅糧，所以薪金、津貼嗰欄係冇畀到，佢兩個主要收入係以股份為基礎嘅支付方式，分別有319.8萬及266.5萬元，而常總仲有500萬元嘅酌情花紅，袍金就兩個都唔多，分別為16萬及14萬元。
最高人工嘅就係副董事總經理李松興，總收入加埋有成2,299.5萬元。
余絲韻