滙豐控股（00005）主席葛霖去年出嘅著作《Good Value》，差一個馬鼻就贏到《金融時報》最佳財經書籍，依然好多人對呢本書有興趣，佢早排喺大陸行咗一轉，順便推介自己本書。原來葛霖睇書嘅範疇好闊，最近竟然開始睇唐詩。
佢話好難揀一本最喜歡嘅書，《聖經》、莎士比亞作品都好鍾意，佢認為讀書係一件可以延續終身嘅事情，例如最近佢開始睇唐詩，吸取中國文化中嘅營養，當然只能睇翻譯版，但佢希望最終可以學習中文睇原著。據講佢早前仲將中國四大文學名著之一嘅《紅樓夢》全部睇晒。
金融海嘯令公眾睇清楚一啲銀行家嘅貪婪面目，銀行家嘅支持度跌到好低，葛霖既係銀行家又係牧師，真係有一番體會。葛霖話銀行業對於任何一個現代經濟體都係重要嘅，有一部分銀行家貪婪過度，創造咗冇真正價值嘅產品，社會付出大代價。雖然呢班人只係一小撮，但必須吸取當中嘅教訓。
葛霖曾經喺書中提到嗰啲「和魔鬼交換靈魂的人」，佢話呢個人物嘅比喻係取材於德國著名小說《浮士德》，講述一個人與魔鬼簽訂咗協議，用靈魂交換大量物質。呢個故事嘅着重點就係提醒大家，仲有比物質享受更為重要嘅嘢。
葛霖話人類真正嘅幸福來自貢獻，如果忘記咗就會導致貪婪，亦就係金融危機前見到嘅狀況。
余絲韻