道指雖然未衝穿11,000點，但近日氣勢之強，亦深深感染疲弱嘅港股，內銀股集資潮快告一段落，憂慮減退，一眾炒友又開始諗吓點搵食，恒指亦不知不覺又重返21,000點之上。雖然氣氛都係好悶吓，但啲股仔開始聞到啲炒味，只要大市死唔去，自然有人埋位落鑊炒。
經過一年努力，勵晶太平洋（00575）所經營嘅准東動力煤項目，已經有勘探嘅初步結果，獲確認嘅動力煤資源總量就有29億噸。勵晶去年多次延售准東項目，而售價亦由3.8億元提升至4.6億元，今次出咗份準確嘅勘探報告，料應該好快有好消息。項目未賣出，但股價先行，橫行咗成半年，尋日終於重上0.25元，成交增加，似乎有人想偷步掃定貨，單交易五月底到期，傳買家只等國資委批准而已，勵晶快將袋袋平安，股價自有一番刺激，向上暫睇0.32元，止蝕位可定0.24元。
古晨