自從國務院喺年初批准海南省建國際旅遊島開始，與海南有關嘅消息就不外乎係樓價、地產商及炒家呢幾個主題，其實呢排大興土木唔單止令樓價飆升，對當地生態環境帶嚟嘅影響同樣值得大家關注。好似有「馮大炮」之稱嘅內地大導演馮小剛，最近都要向發展商公開呼籲，請大家千萬要手下留情，唔好破壞咗海南嘅自然美景。
可能因為做導演成日要費盡心思四圍取景，馮小剛對自然生態環境一向都好重視，佢近日喺三亞出席博鰲國際旅遊論壇時有感而發，話希望想到海南「淘金」嘅地產商都可以尊重海南島，唔好因為錢而破壞咗呢個地方嘅生態，否則海南就會失去佢最核心嘅價值。
佢同時大開地產發展商玩笑，話就係因為佢哋冇文化，又有一班所謂嘅建築學家搞搞震，先搞到依家北京有咁多肉酸嘅大樓，為咗避免再出現建築垃圾，建議海南島開發建設時要請多啲藝術家嚟，而唔好搵所謂嘅建築專家。
至於身為導演嘅馮小剛就好樂意喺海南拍攝《非誠勿擾》第二集，為拉動當地旅遊業出一分力。
余絲韻