美國《福布斯》早前公布咗全球富豪榜，當中有唔少內地富豪上榜，喺內地搞《胡潤富豪榜》嘅胡潤話，全球十大最富有嘅白手興家女性，有5位都喺中國，佢大膽預言喺15年後，中國IT界最有可能登上《福布斯》富豪榜首，佢睇好嘅幾位仁兄都係網絡起家，包括盛大創辦人陳天橋及千橡嘅陳一舟。
《福布斯》最新嘅排名榜，最令人矚目係坐擁身家535億美元（約4,173億港元）嘅墨西哥電訊大亨斯利姆以5億美元之差，壓倒微軟創辦人蓋茨，係16年來首次由非美國人榮登榜首。大陸就有64名富豪打入全球富豪榜，較去年嘅28人大增，並首次成為美國以外最盛產富豪嘅國家。
胡潤所「貼」嘅首富人選準唔準要等15年後至知，不過佢所提嘅人物，依家已經係好成功嘅IT巨人。
盛大創辦人兼CEO陳天橋專做網絡遊戲產品，佢嘅「盛大在線」及「盛大游戲」業務好出色，最新嘅搞作係電子書，揚言「我們要做中國嘅亞馬遜」。
陳一舟係靠網絡發達，早喺○○年與兩位大學校友創辦ChinaRen網站，之後以3,300萬美元賣畀搜狐，○二年創辦咗千橡互動集團，之後收購校內網，成立中國最大嘅大學生校內網，校園用戶覆蓋率達95%以上；○八年千橡集團市值高達12.3億美元。
余絲韻