除咗闊別多年嘅「校長」李福兆出現喺證券商協會30周年慶典高潮外，尋日酒會上亦有不少焦點，好似兩位新任副主席朱李月華與楊玳詩亦着得「靚靚」兼「閃令令」，出席新一屆理事就職典禮。
朱太選着一件時款嘅長衫（類似旗袍），佢仲說自己係第一次着長衫，話擔心會太老氣。絲絲就話佢肯定可以放心，因為件長衫非常時款，加上配合今年流行嘅鞋款，個Look完全掂！
原來佢呢件長衫係佢喺北京開《兩會》期間到王府井買，係佢自己選布料，為咗配合呢個長衫Look，佢老公尋日亦着件唐裝衫嚟襯佢，難怪兩人一齊出現謀殺咗唔少菲林。至於楊玳詩尋日選着綠色裙出席，斯文得嚟又大方得體。
尋日大會亦邀請咗唔少稀客出席，好似港交所（00388）前主席李業廣及前行政總裁周文耀，兩人亦喺晚宴上分享心得。
李業廣話睇番過去10年金融業發展，交易所合併的確係一個好重要嘅里程碑，當年佢有份與經紀業界傾合併，最後爭取到一啲有利業界嘅條件，成功合併。絲絲亦同意，如果當年冇合併，本港金融業發展未必會好似今日咁興旺！
余絲韻